ماجدولين سعد جادين......منــــــــــو

من طرف **jassim** الأحد 28 يناير 2018, 9:02 pm

منــــــــــو

منو القال ليك خُش
وإتصفَّح الآهات كتب وجعة؟!
منو الودَّاك دُروب تاهت
وضلَّت سكة الرجعة؟
ومنو اللولاك في ليلة فرح فجعة
وفرَّش ليك سرير آلام
لحافك ما قَدُر كرعيك
وِسادتك هَمْ
مُنَجَّدة بي خيوط مغزولة من دمعة
ودموع ناساً كُتار زيّك
تفتّش للرحيل هَجْعة
منوالخلاك تطَوّل قامة أحلامك
علي كتف الحقيقة شبر
تكبّر فيك أمل كضاب
مواعينك صغار بالحيل
قُدُور غيرك براح واسعة
منو الفتَّر خطاوي يقينك الثابتة
قناعتك للهلع سجدت
وبدّل هيبتك ركعة
منو الخلاك تسمع للحنين ألحان؟!
وتفتكر الكآبة فرح
وصوت الآهة في جوّاك.... صبح سجعة
منو الخلاك تشرب من سرابك هم
وتروي حلق هواك عطش
تفتش معجزة تتحقق أما*-تم الحذف. كلمة غير محترمة لا يسمح بها في هذا المنتدى-*
وفيك تتطبق البدعة
منو اللخبط كيان الفرحة في جواك
منو البدّل حساباتك
تغيّر حسبة الأيام
وسبتك في الحساب جمعة؟!
منو القال ليكا أطلع للقمر شوفو
وما وراكا إنو القمرة سرّاقة
بتتزيَّن علي حساب الشمس يوماتي
وودّاك مكمن الخدعة
منو الغشّاك ؟ منو الجرحك؟
منو الغيّب بديهتك فيك؟
منو الخدعك؟
منو السّاقك علي الأوجاع
وطوَّل سِكَّة الرجعة!!

من طرف **حميد العامري** الأحد 28 يناير 2018, 10:08 pm

مشاركة مميزة

تسلم الأيادي

أحسنت الاختيار

بانتظار جديدك

ماجدولين سعد جادين......منــــــــــو

ماجدولين سعد جادين......منــــــــــو

رد: ماجدولين سعد جادين......منــــــــــو